5 მიზეზი, რის გამოც ვარჯიშით წონაში ვერ იკლებთ

ვარჯიშობთ თავდაუზოგავად თვეების (შესაძლებელია წლების) მანძილზე და სასწორის მაჩვენებელი არაფრით არ მიიწევს ქვევით? იხილეთ 5 მიზეზი, რის გამოც ვარჯიში აღარ მოქმედებს წონის კლებაზე და ფიტნეს-ექსპერტების რჩევები:

1. ვარჯიშის გამო მეტს ჭამთ:

ვარჯიშის გამო ხომ არ ფიქრობთ – „მე დავწვი კალორიები და ამიტომ ვიმსახურებ კალორიებს“? გამოკვლევებმა აჩვენა რომ ადამიანები მიდრეკილები არიან მოუმატონ ჭამას, როცა ვარჯიშობენ, – ამბობს მაიკლ ოლსონი, ფილოსოფიის დოქტორი, ვარჯიშის მეცნიერების პროფესორი. ფიქრობ, რომ შენი 45 წუთიანი დილის სირბილი საკმარისია იმისთვის, რომ მშვიდად მიირთვა შოკოლადის ნამცხვრის დესერტი? დაფიქრდი: საშუალოდ 65 კგ. წონის ქალი წვავს დაახლოებით 476 კალორიას 45 წუთი სირბილის განმავლობაში.  რესტორნის  დესერტი საშუალოდ 1200 კალორიას შეიცავს, ასე რომ ნახევარი პორციის ჭამით, 10 წუთში წყალში ყრით თქვენი დილის სირბილის შედეგს.

გამოსავალი: ვარჯიშს შეუსაბამეთ თქვენი ორგანიზმისთვის საჭირო კალორაჟის რაოდენობის ჯანმრთელი დიეტა, თუ გსურთ რომ წონაში დაიკლოთ. ოლსონი გვირჩევს შეადაროთ თქვენს მიერ მიღებული კალორიების და ვარჯიშის დროს მოხმარებული კალორიების რაოდენობა.

2. ვარჯიშის მერე ბოლომდე გამოფიტული ხართ

თავდაუზოგავი ვარჯიში მშვენიერი საშუალება ჩანს წონის დასაგდებად, მაგრამ რატომ არ ვიკლებ? თუ ვარჯიშის მერე გადაღლილი, ბოლომდე გამოწურული და დაქანცული ხართ და მხოლოდ იმას ნატრობთ, მთელ დღეს წამოწოლილი როგორ გაატარებთ, ასეთ დატვირთვას თქვენთვის მეტი ზიანი მოაქვს, ვიდრე სარგებელი, – ამბობს ალექს ფიგუეროა,  ბოსტონის სპორტული კლუბის პერსონალური მწვრთნელი და ფიტნეს ინსტრუქტორი. თქვენი ვარჯიში პირიქით ენერგიის წყარო უნდა იყოს, ხოლო ორგანიზმის ზედმეტად დატვირთვა საპირისპირო ეფექტს იძლევა. გადატვირთვამ შაქრის მოთხოვნილების ზრდა, იმუნური სისტემის დასუსტება და უძილობა შეიძლება გამოიწვიოს – ეს ყველაფერი კი წონის დაგროვების მიზეზი გახდეს.

გამოსავალი: ფიგურეოა გვირჩევს იმ დონის დატვირთვების მიღებას, რომელიც თქვენს ფიტნეს მომზადების დონეს შეესაბამება – ის რაც გამოწვევაა თქვენი სხეულისათვის, მაგრამ სრულად არ გფიტავთ ენერგიისაგან. არ ხართ დარწმუნებული რა უმჯობესია თქვენთვის? შეეცადეთ პერსონალურ მწვრთნელთან განიხილოთ თქვენი მიზნები და ერთად შეადგინოთ თქვენი ვარჯიშის გეგმა

3. ვარჯიშის დროს წვავთ იმაზე ნაკლებ კალორიას, ვიდრე გგონიათ

თავს ბედნიერად გრძნობთ, როცა სარბენი ბილიკი გიჩვენებთ, რომ 800 კალორია დახარჯეთ? ნუ იჩქარებთ სიხარულს, – გვირჩევს ოლსონი. კალორიების ასეთი მაღალი წვა იშვიათია, ამბობს ის, ტრენაჟორების უმეტესობა არაზუსტია და 30%-ით მეტ ციფრს გვიჩვენებს ხოლმე.

„ბევრი ტრენაჟორი არ ითვალისწინებს თქვენს წონას და კალორიების მაჩვენებელი გასწორებულია წინასწარ გაწერილ საშუალო მონაცემზე, მაგალითად 70კგ-ზე. თუ თქვენ იწონით მაგალითად 60კგ.-ს, თქვენ არ დაწვავთ იგივე რაოდენობის კალორიებს, რაც მითითებულია აღნიშნული საშუალო მონაცემისთვის.

ხანდახან მიმართავენ პულსის მაჩვენებლის მიხედვით გამოთვლას, რაც ასევე არაზუსტია. „ისეთ ტრენაჟორებზე ვარჯიშმა, რომლებიც მოიცავენ  ხელების აქტიურობასაც (მაგ: სტეპერი ან თხილამურები), შესაძლებელია  გამოიწვიონ უფრო მაღალი პულსაცია, ვიდრე მხოლოდ ფეხების ტრენაჟორმა (მაგ: სარბენი ბილიკი), თუმცა ეს არ ნიშნავს რომ მეტ კალორიას წვავთ“, – ამბობს ოლსონი. „გამოკვლევებმა გვიჩვენა, რომ კალორიების წვის ერთიდაიგივე დონეზე, პულსი უფრო მაღალი იყო როცა მოქმედებაში ხელებიც იყო ჩართული, ასე რომ თქვენ შეიძლება წვავდეთ ნაკლებ კალორიას მაღალი პულსის მიუხედავად.
გამოსავალი: შეეცადეთ დაითვლოთ დაფარული მანძილი, რათა უფრო ზუსტად დაითვალოთ დახარჯული კალორიების რაოდენობა, ამბობს ოლსონი. „მაგალითად, თუ გსურთ დაწვათ 300 კალორია, იძუნძულეთ 3 მილი (4,8კმ.), იარეთ 4 მილი (6,4კმ) ან  იარეთ ველოსიპედით 10 მილი (16კმ.).

4. თქვენი ვარჯიში არაა დაბალანსებული

მრავალფეროვნება ყველაფერშია საჭირო, ესაა საშუალება მიიღოთ უკეთესი, ჩამოსხმული და ძლიერი სხეული. არ არსებობს აქტიურობის მხოლოდ ერთი სახე, რომელიც ყველაფერს მოგცემთ, რაც გჭირდებათ.

მხოლოდ კარდიო ვარჯიშით ან იგივე ძალოვანი ტრენინგით გადაღლა, ნიშნავს შესაძლებლობას კარგავთ მიიღოთ მკვრივი კუნთები და ახალი გამოწვევა გაუკეთოთ თქვენს სხეულს განსხვავებული ტიპის დატვირთვებით (ახალი დატვირთვით მეტ კალორიას დაწვავთ) და ერთ ადგილზე იყინებით.

გამოსავალი: შეადგინეთ კვირის სავარჯიშო პროგრამა სხვადასხვა დატვირთვის სახეებით (კარდიო, ძალოვანი ტრენინგი, მოქნილობა), რომ თქვენი გონება და სხეული მთლიანად ჩართული იყოს. საუკეთესო შედეგების მისაღებად, ოლსონი რეკომენდაციას უწევს მინიმუმ სამ ძალოვან ტრენინგს და 3-5 კარდიო დატვირთვას კვირაში.

5. თქვენი ვარჯიში სრულიად დაძველდა

ერთიდაიგივე პროგრამით ვარჯიშობთ კვირიდან კვირამდე? ივარჯიშეთ უფრო მეტი წონებით კალორიების წვის დონის ასამაღლებლად, და ამავე დროს შეეცადეთ დაკავდეთ ისეთ სექციაში, რომელშიც აქამდე არ გივარჯიშიათ, მაგალითად იოგა ან პილატესი –  რჩევას იძლევა სონრისა მედინა, ფლორიდის სპორტული კლუბის ფიტნეს ჯგუფის მწვრთნელი.

რატომაა ცვლილებები საჭირო? ერთიდაიგივე ვარჯიშის კეთება ნიშნავს, რომ თქვენი ორგანიზმი ისე აღარ იღლება რამდენიმე კვირის შემდეგ. ჩვენ ვსწავლობთ როგორ გავაკეთოთ მოძრაობები და შევასრულოთ აქტივობა. რაც უფრო მეტად ვიცით, იმდენად ნაკლებად აქტიურია  ჩვენი სხეული, რაც ნიშნავს რომ იწვება ნაკლები კალორიას, ვიდრე მაშინ როცა მოძრაობები შენთვის ახალი იყო – ამბობს ოლსონი.

გამოსავალი: თუ შეეცდებით უფრო მძიმე წონებით ვარჯიშს ან მეტ წინააღმდეგობებს ჩართავთ ველოსიპედით სიარულისას, ამით შეიცვლება  ინტენსივობა და ვარჯიშის სტილი, რაც კალორიების წვის დონეს აამაღლებს და ისევ გააგრძელებთ წონის კლებას.  ისეთი ვარჯიშის დამატებით, როგორიცაა იოგა და პილატესი, რომლებიც როგორც წესი კალორიების წვის დიდი რაოდენობით არ გამოირჩევიან, თუ ეს დატვირთვა თქვენი სხეულისთვის უცხოა, ის მაინც კარგ ცვლილებებს შეიტანს თქვენს ფიზიკურ ფორმაში ახალი მოძრაობების და აქტიურობის ფორმის საშუალებით.